Sa bahay namin, pansin na pansin. Tumutulo ang bubong eh. Tapos pag malakas-lakas ang hangin, nakakakaba pa yung tunog ng yero.
Patapos na talaga ang summer. Hindi na mapipigilan. Tiyak, madaming matutuwa lalo't sobrang init nitong mga nagdaang buwan at linggo.
Di ba?
Kinulang ang hangin na kayang ibuga ng electric fan at aircon para makaramdam ng ginhawa dahil sa napakainit na panahon. Me mga araw na tipong kaliligo mo pa lang, basang-basa ka na naman ng pawis.
Ang tanong... Handa ka na ba?
Handa ka na ba sa tag-ulan? E sa bagyo at sa baha? Kung taga-Dagupan ka, alam mong magkapatid ang tatlong yan. Konting ulan, baha. Pag me nadaang bagyo, baha pa rin. At lately, dahil sa tinatawag nilang climate change, posible na maging mas malala pa nga ang mga mararanasan nating baha rito.
Naalala mo ba yung Pepeng? Sobrang nakaka-phobia yung experience na yun. Pero, oo. Baka sample pa lang yun. Baka mas malala pa yung mga parating.
Pano kasi, di na rin tayo natuto. Reklamo tayo ng reklamo pag bumabaha e di naman tayo marunong mangalaga ng kapaligiran. Sa jeep na lang, kunwari. Pansinin mo yung mga kumakain. Kahit alam naman na me basurahan dun sa loob ng sasakyan, bat kaya parang mas enjoy na enjoy pa ring magtapon sa bintana?
O kaya yung mga naglalakad sa kalye at nakaisip bumili ng candy ke Manang. Maliit na wrapper na lang, di pa magawang maibulsa at kelangan pa talagang ikalat kung saan.
At maraming-marami pang ibang na halimbawa na pwede nating banggitin gaya ng mga nagtatapon ng basura sa ilog, etc. Nakakahiya mang aminin pero mukhang hindi tayo natuto sa leksyong iniwan ni Pepeng.
Kaya mag-ingat lagi, mga kapatid. Darating ang ulan. Ang bagyo. At sigurado rin, ang baha. Marami naman kasi sa 'tin ang walang ginagawa para maiwasan - or at least, mabawasan man lang - ang mga ganitong pangyayari.
